По објавата на веста од Државниот завод за статистика дека и во декември, на годишно ниво, инфлацијата изнесува 4,1 проценти, гувернерот Трајко Славески уверува дека таа ќе се намали.

– Очекувам дека инфлацијата и натаму ќе следи патека на надолно приспособување и во 2026 година ќе се сведе на 2,5 %, а потоа ќе се врати на историскиот просек од околу 2 проценти. Поволните движења на светските цени, закотвените инфлациски очекувања и ограничените притисоци преку каналот на домашната побарувачка ќе бидат главните фактори за овие остварувања. Натамошната стабилизација на надворешната позиција на домашната економија ќе обезбеди дополнителен девизен потенцијал и соодветно ниво на девизни резерви неопходни за одржување на стабилноста на домашната валута. Сепак, високата светска променливост и непредвидливоста се неминовни и во следниов период. Народната банка како и досега внимателно ќе ги следи остварувањата со цел да обезбеди стабилност и истовремено да ги поддржи условите за одржлив економски раст во наредниов период – изјави Славески во интервју за „Економија и бизнис“.

Според Државниот завод за статистика, трошоците за храна и за безалкохолни пијалаци во декември се зголемиле за 5,3 проценти во декември минатата година во однос на декември 2024 година.

Во ноември вкупната инфлација беше 4 проценти на годишно ниво, а само инфлацијата на храна беше 5,4 проценти.