Сориано до УЕФА: Не се точни обвиненијата за Сити!
Извршниот директор на клубот вели дека менаџерот Гвардиола и играчите го оставаат својот фокус целосно на фудбалот и дека сите се мирни.
За првпат од објавувањето на казната со која УЕФА го суспендираше Манчестер сити од европските натпреварувања на две сезони, се огласи и извршниот директор на клубот, Феран Сориано кој не се согласува со тврдењата на европската фудбалска куќа.
– Најважното нешто кое имам да го кажам денеска е дека она за што сме обвинети не е точно. Тоа едноставно не е точно – рече Сориано.
– Навивачите можат да бидат сигурни во две работи. Првата е дека сите овие обвинувања се неточни. Втората е дека ќе сториме сè што е во наша моќ да го докажеме тоа – додаде тој.
– Знаеме дека навивачите нè поддржуваат. Ние го чувствуваме тоа. Љубителите на Манчестер сити имаа многу предизвици во последните десет години. Ова е само уште еден предизвик. Ние сме клуб кој заработува пари, кој нема долг. Нашите сметки се контролираат постојано, од ревизори и инвеститори и сè беше секогаш јасно. Бараме решение за овој тежок процес. Се надеваме дека ќе биде фер и се надеваме дека ќе биде завршен пред почетокот на летото. До тогаш, ќе ја завршиме нашата работа како и обично.
Сориано изјави дека менаџерот и играчите го оставаат својот фокус целосно на фудбалот и дека сите се мирни.
– Јасно е дека Пеп е информиран за сè што се случува, но овој процес не е нешто за што треба да се грижи. Тој е фокусиран на фудбалот, на наредните натпревари, како и играчите кои се мирни, концентрирани. Ваквиот процес е повеќе деловен и правен отколку фудбалски – заклучи извршниот директор на Манчестер Сити.