Поранешната пратеничка и функционерка во Социјалдемократскиот сојуз на Македонија (СДСМ), Софија Куновска, во објава на „Фејсбук“ упати нови критики и обвинувања на сметка на актуелниот лидер на партијата, Венко Филипче, откако вчера, на негово барање, оставка поднесоа сите членови на раководството на СДСМ, но не и самиот Филипче.

„Дали СДСМ драматично тоне под негово водство? Дали сета кадровска политика и за органите во партијата и за кандидатите за градоначалници и советници ја водеше сам, во консултација со Муртино? Дали сите политики, изборот на тим и фирма за кампања го обликуваше сам, пишуваше резолуции без согласност на органите на СДСМ и координација со пратеничката група, се нудеше за широка коалиција, што јавно, што скриено, постојано се туркаше во прегратките на Мицковски?“, прашува во објавата поранешната пратеничка на СДСМ.

Таа понатаму пишува:

„Исход, сите дома, тој останува. Ако уште ова помине кај „интелектуалците“ и членството во СДСМ, нека се подготват партијата да се задолжува и натаму додека не се „потроши“ и зградата, а во меѓувреме сите да бидат средство во функција на личните интереси на неколку криминални ликови, чии дела што им демнат со затворски казни над глава треба да застарат“.

„Венко никогаш и немал на памет идеја дека е дојден да победува СДСМ. Но, едно нека остане запаметено, а тоа е дека цената за овие „туѓи бели дворови“ ќе ја плати не само СДСМ, туку и ВМРО—ДПМНЕ и сите граѓани на Македонија“ вели Куновска.