Словенците живеат подолго од повеќето Европејци, а најновите податоци покажуваат дека очекуваниот животен век во Словенија е 82 години, пишува Н1 Словенија.

Овие податоци укажуваат дека очекуваниот животен век во Словенија е малку над просекот во остатокот од Европа, каде што просечниот животен век се проценува дека варира помеѓу 79 и 81 година. Според најновите податоци од словенечката влада, очекуваниот животен век на мажите е 79,1 година и 85 години за жените.

Годините на здрав живот се 65 години за мажите и 68,5 години за жените – што е значително над просекот на Европската Унија, според Владата.

„За ова придонесуваат и добро развиените превентивни и скрининг програми, кои овозможуваат рано откривање на болести и поефикасен третман. Морталитетот од причини што може да се спречат е помал отколку во ЕУ, а предвремената смртност брзо се намалува“, вели словенечката влада.

Се додава дека повеќе од половина од возрасните се редовно физички активни, што дополнително придонесува за подобро здравје и квалитет на живот.

„Словенија останува стабилна и ориентирана кон развој. И покрај предизвикувачката меѓународна ситуација, бележиме економски раст и очекуваме тој да продолжи. Податоците за БДП за вториот квартал од оваа година ги одразуваат приоритетите на владата, во кои инвестираме со јасна цел да го подобриме квалитетот на животот на нашите граѓани“, изјави словенечкиот премиер Роберт Голоб во четврток.

Тој додаде дека Словенија ќе „продолжи да ја зајакнува својата отпорност, конкурентност и разумен економски развој“.