Градоначалникот на Скопје, Орце Ѓорѓиевски информираше дека се сретнал со преставници од угостителскиот сектор со кои бил постигнат договор околу поставувањето контејнери, наплатата за собирање на отпадот, а додаде и дека бил одреден посебен советник за угостители.

„Го враќаме ноќниот живот во Скопје, но истовремено го враќаме и редот. Ова е заедничка обврска кон граѓаните“, нагласи градоначалникот.

Ѓорѓиевски соопшти дека секој угостителски објект ќе треба да обезбеди сопствени контејнери за отпад и секој локал ќе добие посебен тарифник и термини за собирање на отпад.

Исто така, на оваа средба, Драган Арсовски бил назначен и посебен советник на градоначалникот задолжен за секојдневна комуникација меѓу угостителите и Градот.

Дополнително, договорено е до 15 јануари угостителите да ги достават елаборатите за користење на урбаната опрема за да се знае колкав надворешен простор користат угостителите, што изминатите години беше навистина голем проблем кој тогашната гарнитура во Град Скопје не го регулираше и не вршеше наплата.