Државната секретарка во Министерството за човекови и малцински права, Мирјана Пајковиќ, во петокот поднесе оставка, еден месец откако се појави скандалозна експлицитна снимка со неа и довчерашниот советник на претседателот на Црна Гора, Дејан Вукшиќ, објавија црногорските медиуми..

Снимката стана вирална, а двајцата цел месец јавно меѓусебно се обвинуваа околу скандалот. Вукшиќ поднесе оставка на функцијата пред Нова година, кога Пајковиќ против него поднесе кривична пријава. Денеска се огласи Агенцијата за национална безбедност, која соопшти дека немала никаква врска со создавањето, поседувањето или дистрибуцијата на контроверзните снимки кои се појавија на социјалните мрежи.

И двајцата изјавија дека станува збор за лични причини.

„Ги отфрлам сите неточни, нецелосни и тенденциозни изјави со кои се обидуваат да ми припишат одговорност без докази за загрозување на приватноста на Пајковиќ и дистрибуција на спорни снимки. Првпат ги видов тие содржини дури кога почнаа нелегално да циркулираат на социјалните мрежи“, рече Вукшиќ во соопштението.

Сепак, тој наведува дека во октомври 2024 година, Пајковиќ незаконски му го украла мобилниот телефон, кој потоа бил злоупотребен, со што „грубо ја нарушила неговата приватност“. Тој тврди дека затоа е направена контроверзната аудиоснимка каде што се слуша како ѝ се заканува.

„Зборовите што ѝ ги упатив на М.П. во таа пригода, кои беа објавени селективно и со временски интервал од една година и три месеци, беа непосредна реакција на кражбата и злоупотребата на мојот телефон“, истакна Вукшиќ.

Тој рече дека во март 2025 година, од непознат број, добил „вознемирувачки пораки“ со снимката со неговиот глас, со јасна закана и обид да го уценат да се откаже од кандидатурата за судија на Уставниот суд. Вукшиќ додаде дека на крајот на декември 2025 година, Пајковиќ поднела жалба против него, доставувајќи ја истата аудиоснимка и „создавајќи лажен впечаток дека е неодамнешен настан, премолчувајќи го фактот дека настанот се случил пред повеќе од една година и дека таа веќе била испрашувана за обид за уцена по повод истото аудиоснимање“.

Пред да поднесе оставка, Пајковиќ поднесе три кривични пријави поради неовластено дистрибуирање на експлицитна содржина – фотографија од неа. Таа се сомнева дека Вукшиќ, свесен за незаконитоста, се обидел да ги искористи информациите што ги добил поради природата на функцијата што ја извршувал, и дека се заканувал со тој материјал, а индиректно зборувал за постоење на компромитирачки материјал во емисија.

На едно од аудиоснимките што Пајковиќ ги објави, може да се слушне како Вукшиќ наводно се заканува дека „цела Црна Гора ќе мора да ги види“ компромитирачките фотографии и видеа на функционерката.