„Трагедијата во Кочани претставува тешка лекција и сериозен аларм за државата“, рече портпаролката на Владата и членка на Извршниот комитет на ВМРО-ДПМНЕ, Марија Митева, во емисијата „Топ тема“ на телевизија „Телма“, наведувајќи дека системот „предолго време“ бил во „длабок сон“.

Суштината, вели таа, не е само во „будењето“ на системот, туку во неговото стабилно и континуирано функционирање, независно од политичките промени.

„Кочани беше една тешка лекција за сите и силен аларм за државата, затоа што системот предолго време беше во длабок сон. Но, поважно е кога ќе го изградите системот, тој да продолжи да функционира и да не се руши со секоја промена на власта, туку да работи врз принципи кои ќе се почитуваат доследно“, рече Митева, не објаснувајќи што ја спречило нејзината партија и владата што ја предводи ВМРО-ДПМНЕ да го будат и да го менуваат заспаниот систем во десетте месеци помеѓу доаѓањето на власт и трагедијата во дискотеката „Пулс“.

Според неа, по трагедијата биле спроведени засилени инспекциски контроли и направена сеопфатна анализа на институционалните слабости, со цел да се намали ризикот од злоупотреби.

Раните не се затворија, сега се уште подлабоки