Познатата инструкторка по пилатес, Јасна Лековска, ни долови што се прави во едно деноноќие.

„Денот ми започнува во 6 часот наутро. Со пиењето на утринското кафе во мир и тишина, го отворам организерот (Notes) за да направам преглед на обврските што ги имам во текот на денот.
Потоа, следува секојдневната рутина околу лицето, како и подготовката со ќерка ми Лиа за одење во градинка. Потоа продолжувам на работа во студиото „Тринити“.

Секој ден, наутро имам часови – групни и персонални тренинзи, а откако ќе завршам со нив, понекогаш знам да испијам кафе со пријателките или да одам на некој третман за себе, или пак да се посветам на завршувањето на некоја од обврските за клиентите со коишто соработувам.

Лиа завршува со градинка во 12.30 часот, па потоа следува играње со братучетка ѝ Срна и јадење сладолед. Лиа ми прави друштво во текот на персоналните часови (тренинзи) што ги имам со клиентите во понатамошниот тек на денот. Таа јаде крофна, а тие вежбаат (хахаха).

Попладнето го чекаме син ми Јан да се врати од тренинг по пливање или кошарка, па сите заедно седнуваме на заеднички ручек – вечера.

Лиа заспива околу 20 часот, а потоа следува гледање некоја серија со Јан и Марко и подготовка за спиење и завршеток на денот.“