Што најмногу читаат Македонците – Тајните на долговечноста и крими-романите на прво место
Деновиве во ТЦ „Зебра“ во Капиштец се одржува пролетен саем на книгата. Саемот почна во понеделникот и ќе трае до утре. Љубителите на книгата можат да бидат почестени со попусти кои се понудени од издавачките куќи „Антолог“, „Арс ламина“, „Култура“ и „Три“.
– Саемот има добар одзив, има многу заинтересирани читатели кои купуваат книги, најчесто се оние „self-help“ книги или книги од психолошки карактер, како да си помогнете себеси, како да бидете поуспешен. Исто така и крими романите и мистериите се доста продавани, како и љубовните романи – ни изјавија од книжарница „Три“.
Попустите на саемот се движат од 10- 20 отсто и важат само таму, што значи дека ги нема по книжарниците на издавачите.
Од книжарницата „Три“ исто така ни соопштија дека доста често се организираат вакви саеми на книга, најчесто во поголемите трговски центри, како „Рамстор“ и „Сити мол“, каде што наскоро ќе има и поголем саем на книгата со повеќе издавачки куќи.
Најкупувани на саемот се книгите на Ју Несбе, кои се криминалистички романи, а често исто така се бара и книгата „Водич за долговечност“ од д-р Митов.