Во петтиот претпоследен натпревар од квалификациите за пласман на Светскиот куп, македонската сениорска репрезентација го претрпе и петтиот пораз. Селекцијата на Шпанија на својот домашен терен во Сарагоса славеше убедливо со конечен резултат 80:44. Во сениорскиот дрес на Македонија дебитираа Рубин Стефанов и Виктор Ташовски.

После веста дека Украина триумфираше над Грузија со 79:66, ги загубивме и теоретските шанси за освојување на третото место во квалификациската група кое исто така води во следната фаза.

Во групата „Г“ Шпанија има максимални осум бодови од четири натпревари, следува Грузија која исто така има осум бодови од пет мечеви, трета е Украина со шест бодови од четири натпревари, и овие три репрезентации обезбедија настап во последната трета фаза од квалификациите за учество на следниот Мундобаскет.

Македонија која има пет бодови од пет натпревари ќе остане на дното, а последниот дуел на 4 јули во Скопје (18.00 часот, СЦ „Борис Трајковски“) против Украинците нема да има никакво резултатско значење, ќе биде последна шанса за нас да ги завршиме квалификациите барем со една победа.

На денешниот дуел против Шпанците, актуелниот светски шампион бевме рамноправни само во првите 10 минути (19:17). Двете по ред, тројки на Санти Јуста, ја донесоа Шпанија до првото двоцифрено водство. Во 15 минута, домаќинот поведе со 33:21. Само четири поени дадовме за шест минути во втората четвртина. Серијата на противниците беше огромна (20:4), за на семафорот да стои 39:21 за „црвената фурија“. Серијата без поени на нашиот тим, за кратко, ја прекина Јакимовски, но Шпанија не застана, до крајот на полувремето се избори за уште поголеми 45:23.

Одигравме доста подобра трета четвртина, особено во одбраната, немаше лесни поени за ривалот. Но, во завршницата на тој период, Шпанија уште еднаш притисна, стигна дo двојно поголеми 62:31 по 30 минути игра. До крајот составот на Скариоло само рутински ја одработуваше задачата. Во нашите редови најефикасен беше Јакимовски со 14 поени (шест скокови), а на спротивната страна Саиз реализираше 19 поени (девет скокови).

Квалификации за Светски куп 2023

Група „Г“

Резултати, петто коло

Украина – Грузија 79:66
Шпанија – Македонија 80:44

Табела:

1. Шпанија 8 бодови (4) 4-0
2. Грузија 8 бодови (5) 3-2
3. Украина 6 бодови (4) 2-2
4. Македонија 5 бодови (5) 0-5

Последно, 6. коло, двојки (4 јули)

Македонија – Украина
Грузија – Шпанија