Шкупи во Гибралтар го потврдува пласманот во второто квалификациско коло и двомечот со Динамо Загреб
Фудбалерите на македонскиот шампион Шкупи денеска од 18 часот на гости кај Линколнн Ред Импс го играат реванш натпреварот од првото квалификациско коло за пласман во Лигата на шампионите.
Шкупи на Гибралтар ќе брани предност од три гола (3:0) која би требало да биде доволна за пласман во второто коло каде го чека хрватскиот шампион Динамо Загреб за кого настапуваат македонските репрезентативци Аријан Адеми и Стефан Ристовски.
Иако имаат предност од три гола, фудбалерите на Шкупи велат дека нема да го потценат противникот.
– Секако дека имаме позитивен резултат од првиот меч и за тоа треба да бидеме среќни, но мораме да бидеме внимателни и да не дозволиме да се случи никакво изненадување на реваншот. Знам дека ќе играме на вештачки терен, па веќе неколку дена тренираме на таков терен. Во текот на целиот меч мораме да бидеме посветени, ќе дадеме сè од себе со надеж за пласман во второто коло – вели голманот на чаирчани, Кристијан Наумовски.