Шабан Салиу и другите директори на ДЗС треба да дадат воведен збор – продолжува судењето за „Пулс“
Поранешниот директор на Дирекцијата за заштита и спасување и актуелен министер без ресор Шабан Салиу и другите обвинети поранешни директори на ДЗС Аднан Џафероски, Беким Максути и Џевад Адеми треба да дадат одбрана односно воведни зборови на продолжението на судењето за трагедијата во дискотеката „Пулс“.
Препорачано
Тие се следни обвинети од вкупно 35 физички и три правни лица кои седнаа на обвинителна клупа за првото обвинение што беше поднесено за кочанската трагедија каде животот го загубија 63 лица.
Сите обвинети досега пред судот тврдеа дека се невини, од газдата на дискотеката Дејан Јованов – Деко, неговиот син и брат, градежните инспектори, проектантката на дискотеката, поранешните градоначалници на Кочани и припадниците на обезбедувањето.
Tврдеа дека за кривичното дело што им се става на товар не се виновни, дека не биле надлежни или немале ингеренции. Ваквите тврдења родителите на загинатите деца ги дочекаа гневно, а вчера на седница на Анкетната комисија во Собрание, се соочија со претставници на власта, побараа правда, но и да се гонат актуелни функционери.
Од ДЗС, освен поранешните директори, обвинет е и генералниот инспектор во ДЗС – Љупчо Грнчиштанов. Потоа поранешните министри Ваљон Сараќини и Крешник Бектеши, како и претставници од Министерството за економија меѓу кои Џеваир Камбери, Шефкет Хазари, Зоран Николовски, Беким Хаџиу, Арлинда Касапи и Размена Чекиќ Дуровиќ.
Воведен збор треба да дадат и пазарните инспектори Миле Ампов, Блашка Евтимова, Весна Кузмановска и Емил Митев, а преостанува и воведниот збор на обвинетиот Александар Нацев, сопственик на агенцијата за обезбедување „Рубикон“ чија постапка беше споена со оваа непосредно пред почетокот на судењето.
Обвинението го застапува тим од 15 јавни обвинители, а во судницата во Идризово на секое рочиште се присутни дел од родителите на загинатите.
