Во својот шести натпревар од квалификациите за Светското првенство македонската женска сениорска репрезентација загуби по вторпат од Северна Ирска на гостински терен во Белфаст со високи 9:0.

Да потсетиме дека во претходниот меч одигран на тренинг центарот „Петар Милошевски“ во Скопје избраничките на селекторот Кирил Изов загубија уште поубедливо од истиот ривал (0:11).

Домашните фудбалерки на денешниот меч постигнаа четири голови во првото полувреме, МекГинес двапати се запиша во листата на стрелците, а по еднаш Холовеј и Фурнс. Во вториот дел уште еден погодок имаа Холовеј и Фурнс, МекГинес го комплетираше хет-трикот во 62 минута, а во триумфот придонесоа уште Мегил и Бити.

Тоа беше петти пораз за нашата селекција која е претпоследнопласирана во квалификациската група „Д“ со три бода, колку и Луксембург на четвртото место.

На врвот е Англија со 15 бодови, два повеќе од Северна Ирска, на третата позиција е Австрија (10), а надното без бодови е Летонија. Следниот меч најдобрите македонски фудбалерки ќе го имаат следната година на 8 април на домашен терен против Англија.