По пријава за сериозни закани и семејно насилство, Основното јавно обвинителство Скопје отвори истражна постапка против едно лице од Чучер Сандево, осомничено за повеќе кривични дела поврзани со недозволено оружје и загрозување на сигурноста.

Како што соопшти обвинителството, осомничениот на 13 јануари во својот дом неовластено поседувал автоматско оружје од типот STEN MKII, кое е целосно забрането за цивилна употреба, како и 71 куршум муниција со калибар 9 милиметри „Пара“, наменета за таков вид оружје. Делото се квалификува како неовластено изработување, држење, посредување и тргување со оружје или експлозивни материи, казниво според член 396 став 5, во врска со ставовите 3 и 1 од Кривичниот законик.

Оружјето и муницијата биле пронајдени по интервенција на полицијата, откако сопругата на осомничениот ги пријавила заканите упатени кон неа и нивните две ќерки, родени во 2006 и 2010 година. Според пријавата, тој најпрво ѝ се заканувал на сопругата дека ќе ја запали, потоа оштетил дел од покуќнината, а со нож им се заканувал и на децата, наведувајќи дека ќе ги убие.

Со ваквото однесување, како што се посочува, кај оштетените било предизвикано чувство на сериозна загрозеност и страв, поради што осомничениот се гони и за кривично дело загрозување на сигурноста, согласно член 144 став 3 во врска со став 1 од Кривичниот законик.

Имајќи ја предвид тежината на сторените дела, опасноста од бегство, како и ризикот од повторување на кривичното дело, јавниот обвинител до судијата на претходна постапка при Основниот кривичен суд Скопје доставил предлог за определување мерка притвор.