Сем Смит проговори за неговото искуство како родово-небинарна личност како и за реакциите со кои се соочил. Минатата година, 28-годишниот пејач откри дека не се чувствува ниту како машко ниту како женско.

Во интервју со Џејмс Корден во емисијата „The Late Late Show“ оваа недела, Сем изјави дека е среќен во својата кожа, но и дека наишол на многу негативни реакции.

„Сè на сè, беше прекрасно, отсекогаш сум се чувствувал така… Можноста да им го кажам тоа на сите и да се чувствувам многу поотворено за одредени делови од мојата личност и мојот живот беше апсолутно неверојатно“, изјави Смит.

„Беше неверојатно, но исто така беше навистина, навистина тешко соочувањето со сите реакции и количината на луѓе кои сè уште не поддржуваат родово неконформирачки и транс луѓе ширум светот“, продолжи Сем.

„Дефинитивно е поголема борба отколку што очекував, но се чувствувам добро во мојата кожа, што е наградата и прекрасната работа“, вели Смит.

Сем исто така изјави дека сега се чувствува повеќе способен и дека подобро се изразува со својата музика.

„Сега чувствувам дозвола, музички да ги покажам сите различни страни од себе… Без разлика дали тоа е играњето, или за кого пеам, или што пеам, едноставно чувствувам дека сега можам да се покажам себеси и да се внесам себеси во мојата музика “, изјави пејачот.