Премиерот Христијан Мицкоски вечерва беше домаќин на ифтарска вечера, која, како што се наведува во објавата на неговата страница на „Фејсбук“, е „организирана во име на Владата“. Вечерата во текот на светиот муслимански месец Рамазан доаѓа два дена откако сличен настан, традиционално, организираше претседателот на Собранието Африм Гаши.

Мицкоски вели дека ова е „симбол на заедништвото и меѓусебната почит во државата“.

Тој оцени дека вечерта поминала „во топла атмосфера, исполнета со разговор и потврда на вредностите кои го поврзуваат македонското општество“.

„Почитта и соживотот се темел на нашето општество. Ваквите средби нè потсетуваат дека различностите се наша сила, а меѓусебната поддршка е патот кон посилна и пообединета заедница“, истакна Мицкоски.

Тој упати и честитка до сите верници кои го одбележуваат месецот на постот, посакувајќи им мир, здравје и благословени денови.