Фудбалскиот клуб Сантош подготвува сериозен тим за враќање во бразилската Серија А. Клубот на Пеле се договори со Нејмар, а исто така преговара со Јувентус за Артур Мело и Челси за Дејвид Вашингтон.

Бразилскиот тим е блиску до договор со „бјанконерите“ за позајмица на играчот од средниот ред.

Договорот меѓу двата клуба ќе вклучува и опција за купување. 28-годишниот Артур Мело не се вклопува во плановите на Тиаго Мота и нема одиграно ниту еден натпревар за „старата дама“ од почетокот на сезоната.

Сантош има начелен договор со Челси за Дејвид Вашингтон. Напаѓачот исто така сака да му се придружи на Нејмар во Вила Белмиро. Останува уште двата клуба да се согласат за деталите околу договорот, кој ќе биде во форма на позајмица до јуни.

19-годишниот напаѓач дојде во Челси од Сантош во летото 2023 година за 16 милиони евра. евра. Досега играше главно за тимот до 21 година на „сините“.