„Самсунг електроникс“ и синдикатот не успеаја да постигнат договор за платите во последната рунда преговори во Сеул, па затоа е најавен 18-дневен штрајк што би можел да влијае на производството на чипови. Синдикалниот лидер Чои Сеунг-хо им изјави на новинарите дека работниците собрани во синдикатот ќе штрајкуваат 18 дена почнувајќи од четврток. Синдикатот, кој наводно претставува околу 74.000 вработени, тврди дека компанијата не понудила соодветна компензација и покрај силниот раст на профитот, кој дополнително е поттикнат од глобалниот бум во вештачката интелигенција.

Двете страни се обвинуваат меѓусебно за неуспехот на преговорите. Чои ја обвини администрацијата дека одбива да прифати предлог посредуван од владата, но не ги откри неговите детали. Од друга страна, менаџментот тврди дека синдикатот бара прекумерни пакети за компензација за работниците во фабриките што бележат загуби.

Барањата на синдикатот вклучуваат модел во кој „Самсунг“ би издвоил 15 проценти од годишниот оперативен профит за бонуси на вработените, додека го укинува сегашниот лимит на бонусите што достигнува максимум 50 проценти од годишната плата. Компанијата возвраќа дека ваквите барања се прекумерни, наведувајќи ја цикличната природа на работењето во полупроводничкиот сектор.

Можните последици од штрајкот се протегаат надвор од самата компанија. Самсунг и СК Хајникс заедно произведуваат околу две третини од мемориските чипови во светот, чија побарувачка силно расте поради развојот на технологиите за вештачка интелигенција. Минатиот месец, „Самсунг“ објави дека неговиот оперативен профит во периодот јануари-март се зголемил осумкратно, на рекордни 57,2 трилиони вони или 38 милијарди долари.

Премиерот Ким Мин-сеок предупреди во телевизиско обраќање дека штрајкот може да предизвика економска штета до 100 трилиони вони, или 66 милијарди долари, ако ги наруши сложените процеси на производство на чипови. Во понеделник, локалниот суд делумно го прифати барањето на компанијата за забрана на планираниот штрајк, па затоа синдикатот мора да одржува одреден број работници за да спречи оштетување на објектите и материјалите и да обезбеди безбедно производство.