Само 17 проценти од Американците ги поддржуваат напорите на американскиот претседател Доналд Трамп да го добие Гренланд, а значително мнозинство од демократите и републиканците се против употребата на воена сила за анектирање на островот, покажува нова анкета.

Во анкетата на Ројтерс/Ипсос, 47 проценти од испитаниците не ги одобруваат напорите на САД да го добијат Гренланд, додека 35 проценти велат дека не се сигурни за нивната цел.

Само четири проценти од Американците  вклучувајќи еден од десет републиканци и речиси ниту еден демократ, рекоа дека би било „добра идеја“ САД да употребат воена сила за да го преземат Гренланд од Данска.

Исто така, 66 проценти од испитаниците, вклучувајќи 91 процент од демократите и 40 проценти од републиканците, рекоа дека се загрижени дека напорите на САД да го добијат Гренланд би можеле да им наштетат на односите на НАТО и САД со европските сојузници.