Соединетите Американски Држави воведоа санкции против поединци и компании во неколку земји поради поддршка на Иран во производството на балистички ракети и беспилотни летала, соопшти Стејт департментот. Мерките се дел од најновиот обид на Вашингтон да изврши дополнителен притисок врз Техеран.

Според соопштението на Министерството за финансии на САД, објавено од Ројтерс, санкциите ги опфаќаат вкупно 32 лица и субјекти од Иран, Обединетите Арапски Емирати, Турција, Кина, Индија, Германија и Украина, кои управуваат со мрежи за набавки поврзани со иранската воена индустрија.

„Овие мрежи претставуваат закана за американскиот и сојузничкиот персонал на Блискиот Исток, како и за комерцијалниот бродски сообраќај во Црвеното Море,“ се наведува во соопштението, пренесува Ројтерс.

САД, заедно со нивните европски сојузници и Израел, долго време го обвинуваат Техеран дека ја користи својата нуклеарна програма како покритие за развој на оружје, додека Иран инсистира дека неговите активности се мирољубиви и насочени кон цивилна употреба на нуклеарната енергија.