Соединетите Американски Држави одлучија значително да ги намалат царинските давачки за тестенините произведени во Италија, што италијанските власти го оценија како важна победа на трговската и дипломатската офанзива на земјата, пренесува Си-ен-ен.

Италијанската новинска агенција АНСА соопшти дека САД ги ревидирале предложените антидампинг тарифи и ги намалиле пред донесувањето на конечната одлука, која официјално се очекува на 11 март. Ова значи дека италијанските производители ќе се соочат со далеку помал финансиски товар при извозот на тестенини на американскиот пазар.

Одлуката доаѓа во период кога Вашингтон најави и одложување на зголемувањето на царините за други италијански производи, како што е мебелот. Италијанското Министерство за надворешни работи оцени дека ова е знак дека американските власти ја препознаваат подготвеноста на италијанските компании за соработка.

Министерството истакна дека резултатот е плод на континуираната поддршка од италијанската влада и активната улога на дипломатијата уште од самиот почеток на процесот. Во напорите се вклучила и Европската комисија, која доставила аргументи во корист на италијанските компании опфатени со мерките.

Претходно, САД најавија дека покрај редовната царина од 15 проценти за увоз од Европската Унија, ќе воведат дополнителни тарифи кои за некои италијански производители можеа да достигнат и до 91,74 проценти, со примена од јануари 2026 година. Со најновата одлука, тие мерки се значително ублажени.