Официјален Киев уште нема добиено предлог за прекин на огнот за 9 мај, ден кој во Русија се одбележува секоја година како ден на победата над фашизмот. Министерот за надворешни работи на Украина Андриј Сибиха денеска изјави дека ваквиот потег од Русија е манипулација. Властите на Русија пак претходно истакнаа дека предложиле прекин на огнот за 9 мај.

– Тоа е уште еден обид на Русите да ги смират Американците, да покажат дека наводно имаат конструктивен дух. Украинскиот претседател Володимир Зеленски јасно стави до знаење дека до денес украинската страна не добила никаков предлог од Русите – додаде Сибиха.

Шефот на украинската дипломатија повтори дека неговата земја е посветена на мировните напори и оти повеќепати изразувала подготвеност за безусловен прекин на огнот.

– И сите тие наводни прекини на огнот, кои не ги почитуваат ниту самите Руси кои ги иницираа, претставуваат груб дипломатски маневар. Тоа е публицитет насочен кон домашната јавност – додаде украинскиот министер.