Руски суд денеска ја казни апликацијата за пораки „Ватсап“ со три милиони рубли (34.718 евра) затоа што не избришала забранета содржина, што е прва таква казна во Русија.

Иако матичната компанија на „Ватсап“, „Мета“ беше забранета во Русија минатата година како „екстремистичка“ организација, апликацијата за пораки – која е многу популарна во Русија – досега не е казнета поради тоа што не ги отстрани забранетите информации.

Другите компании под „Мета“, како „Фејсбук“ и „Инстаграм“ – сега забранети во Русија – беа казнети поради нивната содржина, како и услугите како „Твитер“ и „Гугл“.

„Ватсап“, сепак, претходно беше казнет поради наводно одбивање да се усогласи со рускиот закон за податоци и складирање на податоците на руските корисници на серверите во земјата.

Новинската агенција „РИА“ објави дека казната е изречена денеска како резултат на одбивањето на „Ватсап“ да ги отстрани информациите за лекот „Лирика“, чија продажба и производство е забранета во Русија.

Москва со години е во судир со технолошките компании поради содржината, цензурата, податоците и локалното претставување во споровите што ескалираа откако Русија ги испрати своите вооружени сили во Украина на 24 февруари 2022 година.