Румениге потврди дека Алкантара заминува од Баерн
Извршниот директор на европскиот шампион, Карл-Хајнц Румениге, потврди дека шпанскиот репрезентативец во наредните денови ќе си замине од клубот.
– Изгледа дека Алкантара сака да не напушти. Ни рече дека на крајот од кариерата сака да испроба нешто ново и нема да се предомисли. Тој покажа дека знае да игра на големи натпревари и затоа неговото заминување ќе биде голема загуба за нас – изјави Румениге.
Шпанскиот репрезентативец е најблиску до трансфер во Премиер лигата и тоа во редовите на шампионот Ливерпул, но засега „црвените“ немаат доставено официјална понуда.
Играта на нерви не им се допаѓа на челниците на Баерн и му поставија ултиматум на Ливерпул, до петок да седнат на преговарачка маса инаку Тијаго Алкантара ќе биде понуден на останатите конкуренти.
Најзагреан покрај Ливерпул е Манчестер јунајтед кој е подготвен веднаш да плати 35 милиони евра колку што бараат баварците.
– Очекуваме конкретни понуди во наредните денови. Засега нема ништо – потенцира Румениге.
Тијаго Алкантара во Баерн Минхен пристигна во 2013 година од Барселона и досега одигра 235 натпревар на кои постигна 31 гол. Со Баерн освои седум титули во Бундеслигата, четири германски Купа, три Суперкупа на Германија, светско клупско првенство, а пред една недела триумфира и во Лигата на шампионите.