Кристијано Роналдо по постигнатите два гола во убедливата победа на Португалија над Узбекистан од 5:0 во второто коло на Мундијалот изрази задоволство и истакна дека критиките секогаш ги има кога не му оди на теренот.

Доби прашање Португалецот и дали би сакал да се сретне со неговиот долгогодишен ривал Лионел Меси.

„Би било убаво, но прашањето е бесмислено… Најважно е она што се случи денес. Победивме и ја поминавме групата, а сега мора да се подготвиме за она што доаѓа. Знаеме дека ќе имаме тежок натпревар против Колумбија, но основната цел беше пласман понатаму и успеавме. Играв добро и ѝ помогнав на екипата“, изјави 41-годишниот фудбалер.

Португалија претходните денови беше изложена на критики по ремито со Конго, но следуваше силен одговор на теренот.

„Напредувавме. Тоа е животот. Секогаш има предизвици и најважно е постојано да се подобруваш. Зад нас е многу тешка недела, недела во која јавноста беше многу остра кон сите нас, особено кон селекторот. По 23 години кариера навикнат сум на тоа, кога оди добро, Кристијано е одличен, а кога не оди добро, тогаш сум стар и за пензија. Така ќе биде секогаш. Но ова беше вистински одговор од мене и од соиграчите. Игравме добро, вршевме висок притисок и кога Португалија игра така, тешко е да нè запреш. Не е случајно што постигнавме пет гола“, додаде тој.

Со погодокот на овој натпревар, Роналдо се приклучи на Лионел Меси, Килијан Мбапе и Ерлинг Халанд меѓу стрелците на Мундијалот, а истакна дека никогаш не се сомневал во себе.

„Секогаш се појавувам кога треба. Можеби подоцна отколку што луѓето очекуваат, но тука сум. Затоа и понатаму ја работам својата работа и верувам во она што го правам. Работам напорно, а Бог ми помага. Така било низ целата моја кариера. Најважни ми се тимот и заедништвото со соиграчите и семејството. Сè друго што доаѓа однадвор не можеме да го контролираме. Кога не играме добро и не победуваме, секогаш сме на удар на критики, особено јас, но навикнат сум на тоа и продолжувам понатаму“, заклучи Роналдо.

ВИДЕО | Ибрахимовиќ му одговори на Роналдо: Се вратил? Мислев дека никогаш не замина…

ВИДЕО | Роналдо не сакаше да одговори на прашање за Меси