Министерот за внатрешни работи денес изјави дека претседателот на младината на Левица, Андреј Куцуловски, бил уапсен на натпреварот помеѓу Македонија и Израел бидејќи на деца им извикувал „убијци“, а не затоа што го веел палестинското знаме.

– Не е точно дека е уапсен претседателот на младината на Левица, заради тоа што веел некакво знаме. Претседателот на младината на Левица е уапсен е заради тоа што на дечиња од 14 и 16 години, кои што играле утакмица, им се обраќал со зборот ,,убијци”. И сега што требало да направи полицијата? Фризурата да му ја направи? Или требало да го отстрани од стадионот на којшто присуствувал и се однесувал така како што се однесувал – рече министерот Панче Тошковски.

Левица претходно објави дека Куцуловски бил уапсен на натпреварот во ракомет меѓу Македонија и Израел во СЦ „Јане Сандански“ во април, бидејќи развеал знаме на Палестина.

Од МВР тогаш информираа дека тој бил приведен поради прекршок по член 3 од Законот за спречување на насилство и недостојно однесување на спортски натпревари.

„Денеска (28.04.2026) во 17:20 часот во СВР Скопје е пријавено дека во СЦ ‘Јане Сандански’, каде се одржувал финалниот натпревар од Светско училишно првенство во ракомет помеѓу Р.С. Македонија и Израел, А.К. (28) истакнал знаме од Палестина. Лицето е приведено во Полициска станица за сторен прекршок по член 3 и по целосно документирање на случајот ќе биде поднесен соодветен поднесок“, гласеше соопштението на МВР.

„Место на радост и смеа за децата“: Муцунски отвори игралиште, донација од Израел