Скопската општина Аеродром доби донација од Израел – ново детско игралиште, по повод 30-годишнината од воспоставувањето на дипломатски односи меѓу Македонија и Израел. Игралиштето го отворија министерот за надворешни работи и трговија Тимчо Муцунски, амбасадорката на Израел, Вивиен Ајзен, и градоначалникот на Општина Аеродром Дејан Митески.

„Упатив искрена благодарност до Владата и народот на Израел за континуираната поддршка и солидарност. Во изминатите три децении изградивме пријателски и динамични односи, засновани на заемно разбирање, почитување и поддршка, со соработка во бројни области“, порача Муцунски.

„Овој проект е симбол на пријателство, доверба и меѓусебно почитување. Место на радост и смеа за децата, но и потсетник дека вистинските мостови меѓу народите се градат преку соработка, разбирање и искрени човечки вредности“, додаде министерот.

Кај дел од корисниците на социјалните мрежи денешниот настан предизвика коментари дека Израел и деца не се најдобрата асоцијација поради тоа што во агресијата врз палестинската област Газа, оваа држава за две години уби околу 20.000 деца.