Милиони туристи секоја летна сезона се упатуваат кон плажите, но појавата на бактерии во морската вода сè повеќе предизвикува загриженост. Поради зголеменото затоплување на морето и климатските промени, веќе се регистрирани случаи на затворање плажи во Шпанија, што отвора поширока дебата за безбедноста на капењето во Медитеранот, пишува „Еуроњуз“.

Загриженоста кај туристите и локалното население расте, откако во последните години се пријавени повеќе случаи на загадување и здравствени предупредувања долж европските крајбрежја. Овие појави, комбинирани со зголемени температури на водата и туристичкиот притисок, доведуваат до сè почести ограничувања за пристап до морето.

„Медитеранот ни покажува како изгледа еден потопол свет“, изјави за „Еуроњуз“ Хатим Азнаг, аналитичар за проекти, климатски акции и енергетска отпорност во Унијата за Медитеранот.

Закана од „бактеријата што јаде месо“

Посебна загриженост предизвикува бактеријата „вибрио“, во јавноста позната како „бактерија што јаде месо“. Станува збор за микроорганизам кој природно се наоѓа во морска и слабо солена вода, особено во области каде што реките се влеваат во морето. Според Европската агенција за безбедност на храната, оваа бактерија може да се најде и во морски плодови, а одредени видови можат да предизвикаат болести од гастроентеритис до тешки и потенцијално смртоносни инфекции.

Меѓу најзначајните видови во Европа се вибрио вулнификус, вибрио парахемолитикус и одредени варијанти на вибрио колера.

Инфекцијата може да настане преку консумирање сурови морски плодови или преку контакт на отворени рани со морска вода. Европските здравствени организации предупредуваат дека оваа бактерија е близок сроден вид на онаа што предизвикува колера, иако предизвикува различни заболувања.

Во потешки случаи, инфекцијата може да доведе до брзо разградување на ткивото околу раната, состојба позната како некротизирачки фасциитис. Бактеријата може да навлезе во крвотокот и да предизвика сепса, а во екстремни случаи е потребна и ампутација.

Европскиот центар за превенција и контрола на болести предупредува на зголемен ризик од инфекции во летниот период, особено за време на топлотни бранови и во плитки крајбрежни води.

Идеални услови за ширење на патогенот

Овој феномен е најизразен во Средоземното Море, кое се смета за едно од најбрзо затоплувачките морски подрачја во светот. Според експертите, не станува збор за изолиран случај, туку за подлабок структурен проблем поврзан со климатските промени.

Зголемената температура на морето, заедно со загадувањето и намалената соленост во крајбрежните области, создаваат идеални услови за развој на патогените бактерии.

Според извештаите на европските институции, се очекува понатамошно зголемување на присуството на бактеријата вибрио во морската храна и водните екосистеми, особено во услови на климатски промени.

Економски удар што директно го погодува туризмот

Покрај здравствениот ризик, ширењето на оваа бактерија има и значајни економски последици. Туризмот, кој е еден од најважните економски сектори во медитеранскиот регион, директно зависи од стабилноста на крајбрежните области.

Затворањето плажи или издавањето здравствени предупредувања во текот на туристичката сезона може да предизвика големи загуби за хотели, ресторани и локални бизниси.

Медитеранот е една од најпосетуваните туристички региони во светот, што дополнително ги засилува последиците од ваквите појави. Според експертите, климатските промени и екстремните временски услови ќе продолжат да го зголемуваат ризикот.

Ризик на сегашноста, а не на иднината

За експертите, ова веќе не е проблем на иднината, туку реалност на денешницата. Медитеранот се смета за „термометар“ кој ги покажува последиците од глобалното затоплување.

Според нив, решението лежи во координирани меѓународни мерки и заедничка акција.

Како што истакнуваат експертите, бактериите не се само здравствен ризик, туку и јасен показател за нарушената рамнотежа на морските екосистеми под влијание на топлината и загадувањето.

ВИДЕО | Илјадници медузи го преплавија морето на популарна плажа во Грција