Арјен Робен по завршувањето на минатата сезона замина во фудбалска пензија, но не се „запушти“ и во време на пандемијата на коронавирусот, тој се одржуваше во форма така што тренираше заедно со играчите од неговиот последен клуб, Баерн Минхен.

Згора на тоа Робен планира да го смени спортот, се подготвува да трча на маратон, а сега му пристигна интересна понуда за да се врати на фудбалот.
Бразилскиот тим Ботафого му нуди договор на „лечеткиот“ Холанѓанец.

– Нормално дека постои ризик бидејќи долго време не играше, но Робен е мојот идол и мислам дека се уште е одлучен фудбалер. Беше најдобар играч на СП 2014 година, и е среќен поради интересот на Ботафого – изјави потпретседателот на бразилскиот тим, Рикардо Ротенберг.

Ротенберг дури најмил и агент кој ќе се обиде да го премисли Робен и наместо на маратонските трки, да се врати на фудбалот.

Во бразилскиот тим се надеваат дека ќе добијат помош и од поранешен соиграч на Робен од холандската репрезентација, Кларенс Седорф, кој кариерата ја заврши токму во Ботафого.