Ракометниот клуб Вардар 1961 ја продолжи соработката со тренерот на голманите Марио Келентриќ, кој и во наредните две сезони ќе остане дел од стручниот штаб на „црвено-црните“. Според новиот договор, Келентриќ ќе работи во клубот до јуни 2028 година.

Келентриќ пристигна во Вардар во јуни 2025 година, и легендарниот хрватски голман дојде во Скопје со богато искуство и енергија, откако работеше во Германија. Беше дел од „златната генерација на Хрватска“ која го освои светското злато во 2003 година во Португалија и среброто на Олимписките игри во Атина 2004.

Бранеше за Загреб, Целје, Метковиќ, Тусем Есен и Мелсунген, а како тренер работеше во Гумерсбах, каде четири години беше задолжен за сите категории на голмани во клубот. Исто така работеше и со репрезентацијата на Босна и Херцеговина, како и во ППД Загреб и Слога Добој.

Одлуката за продолжување на соработката доаѓа по сезона во која Вардар се врати на трофејните патеки на домашната сцена и повторно ја освои двојната круна во Македонија.

Голманите на Вардар на многу натпревари беа еден од клучните фактори за добрите резултати, а за нивната форма се грижи Келентриќ. Покрај домашните успеси, Вардар имаше и значаен европски настап, откако стигна до Топ-8 фазата во Лига Европа.