РК Пролет: Само со соодветна отштета Вардар може да ги доведе Аларов и Јагуриновски
Управниот Одбор на АД Ракометен клуб Тинекс Пролет изразува големо задоволство од игрите и резултатите на екипата во првиот дел од натпреварувачката сезона. Освоеното второ место во групата од Супер-лигата е доказ за квалитетната работа во изминатите месеци и максималното залагање на сите ракометари за исполнување на заедничката цел – излез во ракометна Европа.
Пред Тинекс Пролет се наоѓаат сериозни предизвици во натпреварувањето во плејофот, но како и секогаш досега, подготвени се на спортска борба за бодови и надигрување со сите противници.
Финансиите не се никаков проблем, буџетот е стабилен, а ваучерот за 2022 година целосно наплатен, за што јавно упатува благодарност до спонзорите и помагателите на ракометниот колектив. Со тоа се овозможува дополнителна сигурност и стабилност, по што ракометарите ќе можат да се насочат кон она што е најважно за нив – тренинзите и натпреварите во дресот на Пролет.
Добро познато е дека Томи Јагуриновски и Михаил Аларов, по одличните настапи за Тинекс Пролет во првиот дел од сезонава потпишаа договори со РК Вардар почнувајќи од сезоната 2023/24.
– Ние сме горди што имаме двајца исклучителни професионалци во своите редови и желба на сите во клубот е Јагуриновски и Аларов да ја доиграат сезоната во РК Тинекс Пролет и да помогнат во остварувањето на клупските цели. Потсетуваме дека и двајцата ракометари имаат валидни договори со РК Тинекс Пролет до јуни 2023 , по што од срце ќе им посакаме многу среќа во преселбата во таборот на „црвено-црните“. „Јавна тајна“ е дека Вардар сака да ги доведе Аларов и Јагуриновски додека тие се уште се под договор со Тинекс Пролет, но на нашиот скопски ривал треба да му е јасно дека тоа не може да се оствари без соодветна отштета, нешто што е сосема нормална работа во светот на спортот при трансфери на играчи од еден во друг клуб – информираат од РК Тинекс Пролет.