РК Алкалоид го суспендираше тренерот обвинет за физички напад
Раководството на РК Алкалоид донесе одлука за суспензија на три месеци за тренерот Влатко Котески на три месеци.
Котески е суспендиран поради физички напад на млад ракометар на турнир во Унгарија. Инцидентот беше потврден во билтенот на МВР на 6-ти јуни, а до дeнешното соопштение клубот се немаше огласено.
Во соопштението се наведува дека суспензијата може и да се прекине или продолжи во зависност од исходот на истрагата.
„Изречената суспензија може да се прекине и пред завршување на периодот од три месеци за кој е изречена, доколку се донесе правосилна одлука по спроведена Дисциплинска постапка во рамки на Клубот или се донесе Одлука од надлежен државен орган со која е одлучено за поведението на помошникот тренер.
Правилната работа, дефинираниот систем на функционирање, како и интегритетот и кредибилитетот во работењето се основните начела за кои се залага овој клуб. Клубот посветува големо внимание на работата со младите категории на ракометари, како и на воспитувањето и на грижата за правилен развој и за градење здрави спортски личности.
Во согласност со клупската култура и со спортскиот дух, со помош на правилна организација и стручна работа, РК Алкалоид ќе продолжи во остварување на својата визија и мисија да овозможи квалитетен и напреден тренажен процес за развивање и за градење врвни ракометари во македонскиот ракомет“, стои во соопштението.
Татко на малолетен ракометар од Скопје пријавил дека тренерот го нападнал син му во Унгарија