Фудбалската репрезентација на Македонија со поразот од Грузија од 2:0 во петтото коло во Лигата на нации ги загуби шансите за првото место во групата 4 во дивизијата Ц.

Напаѓачот Милан Ристовски смета дека „црвено-жолтите“ повторно од Грузија загубија поради сопствените грешки. На натпреварот што се играше во Скопје, Грузија славеше со 0:3.

– Жалиме што повторно загубивме на наши грешки, исто како и на дуелот во Скопје. Некои грешки се повторија, а имаше и неочекуван пад на концентрацијата. Заслуживме повеќе од овој натпревар, имаме квалитет, но сега не ни останува ништо друго освен да се одмориме добро, да ги анализираме грешкитее и да пробаме да ги поправиме на последниот натпревар во Скопје. Фаворит во фудбалот не постои. Сигурно дека ќе има психолошки пад во нашата енергија, но се надевам дека ќе го пребродиме тоа и ќе извојуваме победа над Бугарија – вели Ристовски.

Во последното коло во Лигата на нации, Македонија в понеделник на Националната Арена „Тодор Проески“ ја пречекува Бугарија.