Борко Ристовски уште еднаш покажа дека и најдобар кога е најпотребно и со неколку одлични интервенции „го носеше“ Вардар до триумф од 23:26 во големото ракометно дерби против Е. Пелистер во Битола и ги стави „црвено-црните“ во пол позиција за титулата.

На три кола до крајот на сезоната има три бода предност пред Е. Пелистер и доколку победи во трите натпревари ќе го „заклучи“ шампионскиот пехар во своите витрини.

Ристовски кој во финишот ги одбрани шутевите на Маџовски и на Граџан и со тоа му овозможи на тимот да дојде до недостижна предност, смета дека Вардар заслужено ќе стигне до нова титула.

– Морам да кажам дека да се игра во ваква атмосфера за мене секогаш било и сè уште е огромна привилегија. Можеби за некого четири или пет илјади битолски навивачи беа притисок, но за мене лично беше едноставно уживање. Мислам дека тоа го реши и самиот меч, ваков вид на натпревар, со огромен набој, не може да игра секој и да се соочи како што треба со ваков притисок. Ние имаме ракометари кои покрај квалитетот имаат и искуство и не подлегнуваат лесно на притисокот што го создаваат навивачите. Мислам дека тоа беше клучот за победата, покрај добрата тактичка поставеност. Кога се ќе се собере и одземе, мислам дека заслужено го добивме овој натпревар и сме на добар пат да ја освоиме титулата. Сега верувам дека сѐ ќе биде полесно и дека ќе можеме да го направиме Вардар како што треба да изгледа за да се натпреварува во Лигата на шампионите. Оптимист сум и верувам дека во следната сезона ќе бидеме уште посилни – вели Ристовски.