Мнозинството во Сенатот на САД вчера застана зад воената кампања на претседателот Доналд Трамп против Иран, отфрлајќи ја предлог-резолуцијата на демократите со која се бараше прекин на операциите сè додека Конгресот формално не даде одобрение, објави „Ројтерс“.

Сенатот со 52–47 гласови реши да не ја продолжи резолуцијата за воени овластувања, што ја потврдува континуираната поддршка на Републиканската партија за воената политика на претседателот, повеќе од шест недели по почетокот на американско-израелските воздушни напади врз Иран.

Трамп претходно изјави дека војната е „блиску до крајот“, додека истовремено началникот на пакистанската војска, кој игра улога на посредник, пристигна во Техеран во обид да спречи обновување на конфликтот по неуспешните мировни преговори за време на викендот.

Ова е четврти пат демократите да иницираат гласање за воени овластувања од почетокот на конфликтот, но сите обиди пропаднаа поради противење од речиси сите републикански сенатори, освен Ранд Пол.

Иран: Ќе ги потопиме сите американски бродови ако САД ја преземат контролата над Ормускиот Теснец

Иако Уставот на САД предвидува дека Конгресот има надлежност да објави војна, претседателите традиционално тврдат дека ова ограничување не важи за краткорочни операции или во случаи на непосредна закана.

Белата куќа и поголемиот дел од републиканците во Конгресот тврдат дека постапките на Трамп се законски и во рамки на неговите овластувања како врховен командант. Анкетите покажуваат дека војната е генерално непопуларна, иако ставовите се силно партиски поделени.

Демократите велат дека Конгресот мора да ја врати својата уставна улога во одобрување војна и предупредуваат дека конфликтот може да прерасне во долготрајна војна. Републиканскиот сенатор Џим Риш ја обвини поддршката на резолуцијата дека е на страната на Иран, додека демократите најавија дека ќе продолжат со обиди за нејзино усвојување.

„Вашингтон пост“: САД подготвуваат копнена операција во Иран доколку пропадне примирјето