За некои, заштитен знак на новогодишните празници е руската салата, за други – мирисот на свежо печени колачиња или бавно печено месо што со часови се подготвува со трпение и љубов.

Токму такви се и рецептите на Кристина Колевски од Битола, вљубеничка во добрата храна, која преку својот инстаграм-профил @solenoblagiprikazni инспирира илјадници луѓе да готват со внимание и посветеност.

Во продолжение ви ги пренесуваме нејзините празнични фаворити, проверени рецепти за трпеза што се памети.

Руска салата

Потребни состојки:

• 350 г шунка
• 350 г кашкавал
• 350 г кисели краставички
• 350 г моркови
• 350 г грашок (од конзерва)
• 350 г компири
• 3 јајца
• 350 г мајонез
• сол и црн бибер по вкус

Подготовка:

Сите состојки исечете ги на коцки (јајцата, морковите и компирите претходно сварени и оладени) и добро измешајте ги.

Состојките може да се подготват од вечер и да се чуваат во длабок сад, а мајонезот, солта и биберот да се додадат следниот ден.

Откако ќе се соединат сите состојки, салатата оставете ја кратко во фрижидер, па сервирајте.

Новогодишни корнети полнети со пилешка салата

Потребни состојки:

За салатата:

• 250 г пилешко месо
• 200 г пченка
• 150 г корнишони
• 200 г варен компир
• 200 г варен морков
• 2 лажици павлака
• 160 г мајонез
• сол по вкус

Дополнително:

• тортилји
• калинка
• рузмарин
• магдонос
• 1 јајце

Подготовка:

Пилешкото месо сварете го и искинете го на конци. Компирите и морковите сварете ги и изрендајте ги. Корнишоните ситно исечкајте ги. Во длабок сад измешајте ги сите состојки и посолете по вкус.

Тортилјите исечете ги на четвртини, оформете корнети, премачкајте ги со изматено јајце и печете ги додека не се стврднат.

Корнетите наполнете ги со салатата и декорирајте по желба.

Колачиња со цимет

Потребни состојки:

• 125 г маргарин
• 120 г шеќер
• 3 лажици мед
• 300 г брашно
• – 1/2 лажичка сода бикарбона
• – 1 лажица цимет
• – 1 лажица какао
• – 2 лажици ладна вода

Кралска глазура:

• 1 белка
• 150-180 г шеќер во прав
• 2-3 капки лимон

Подготовка:

На тивок оган растопете ги маргаринот, шеќерот и медот. Во длабок сад измешајте ги брашното, содата, циметот и какаото, па додајте ги растопените состојки.

Додајте ја ладната вода и замесете тесто. Завиткајте го во најлонска фолија и оставете го во фрижидер околу 30 минути.

Потоа развлечете кора со дебелина од околу 4 мм и вадете форми по желба. Печете во загреана рерна на 200 степени, 8-10 минути.

Белката изматете ја со постепено додавање на шеќерот и на лимоновите капки. По желба, може да се додаде прехранбена боја.

Чоколадна торта

Потребни состојки:

За кората:

•  3 јајца
• 150 г шеќер
• прстофат сол
• 1 ќесичка ванилин шеќер
• 100 мл млеко
• 100 мл масло
• 160 г брашно
• 20 г какао
• 1 ќесичка прашок за печиво

Прелив:

• 120 мл вода
• 1 лажица шеќер
• 1 рамна лажица нескафе

Ганаш:

– 250 мл слатка павлака

– 200 г чоколадо

Подготовка:

Јајцата, шеќерот, ванилата и солта изматете ги пенесто. Додајте ги маслото и млекото, а на крај брашното, какаото и печивото, просеани и нежно промешани.

Смесата истурете ја во округол калап обложен со хартија за печење и печете во загреана рерна на 180 °C околу 20 минути.

Оладената кора прелијте ја со преливот од нескафе. Загрејте ја слатката павлака без да зоврие, додајте го чоколадото и мешајте додека не се растопи.

Со дршка од дрвена лажица направете дупчиња во кората, наполнете ги со ганаш, а потоа прелијте ја целата торта. Оставете ја во фрижидер да се зацврсти.

Бавно печено, шпикувано свинско каре

Потребни состојки:

• 1,5 кг свинско каре
• 3-4 моркови
• 10 чешниња лук
• сенф
• сол
• зачини: црн бибер, мајчина душичка, рузмарин, оригано, лук во прав
• 200 мл црвено вино

Подготовка:

Месото засечете го и направете длабоки отвори што ќе ги наполните со морков и лук. Зачинете го, убаво втријте ги зачините и премачкајте со сенф. Оставете го преку ноќ да отстои.

Пред печење, кратко запржете го од сите страни. Ставете го во тава обложена со влажна хартија за печење и алуминиумска фолија, прелијте со виното и маслото од пржењето и добро затворете.

Печете во загреана рерна на 200 степени околу 3 и пол часа, а потоа откријте го и печете уште 30 минути.

По печењето, месото исечете го и сервирајте.