Данскиот фудбалер на Манчестер јунајтед, Расмус Хојлунд (23), кој ја помина сезоната на позајмица во Наполи, официјално потпиша повеќегодишен договор со клубот од Неапол, беше објавено денес.

Во соопштението не се дадени детали, но Наполи и Манчестер јунајтед објавија дека италијанскиот клуб ги исполнил условите за потпишување на траен договор со Данецот.

Скај Спортс објави дека квалификациите на Наполи за Лигата на шампионите следната сезона автоматски ја активирале откупната клаузула на Хојлунд, која изнесува 38 милиони фунти и дека е потпишан договор со клубот од Неапол до 30 јуни 2030 година.

Запиша 44 настапи за Наполи во сите натпреварувања оваа сезона и постигна 16 голови.

Го облече дресот на Манчестер јунајтед во 2023 година доаѓајќи од Аталанта, а пред тоа играше за Штурм Грац и Копенхаген.