Ракометарите на ПИК Сегед сè уште веруваат во чудо
Желбата за прв пат, ПИК Сегед, да игра на завршниот турнир во Келн, не ги напушта ракометарите. Поранешниот ракометар на Вардар, Жоан Кањељас кој со „црвено-црните“ во 2017 година триумфираше во Лигата на шампионите, верува дека со малку среќа ќе успее да го елиминира македонскиот шампион.
– Мора да го одиграме најдобриот натпревар сезонава доколку сакаме да играме во Келн. Вардар има голема предност но можеме да играме против нив. Добро ја познавам играта на Вардар, тие нема да се исплашат од атмосферата на трибините но мора да ги принудиме да грешат – вели Кањељас.
„Луда“ недела предвидува и крилото, Стефан Сигурмансон.
– Не знам што ни се случи во последните 10-11 минути во Скопје кога ни се распадна играта, но сега ќе биде поинаква приказна. Мора да играме далеку подобро во одбраната, а со добра одбрана ќе имаме и лесни голови од противнапади. Доколку успееме да дојдеме до предност од 4-5 голови до полувремето, сигурен сум дека ќе играме во Келн – не го напушта оптимизмот, Сигурмансон.