Ракитиќ потпишува за клубот кој го одби минатата година
Каталонскиот „Спорт“ објави дека Барселона и Јувентус ги договорија сите детали за размената на играчи.
Миралем Пјаниќ и Матиа де Шиљо во летниот преоден рок ќе се преселат од Јувентус во Барселона, а во обратен правец ќе заминат Жан-Клен Тодибо и Иван Ракитиќ.
Италијанскиот шампион и минатата година се обиде да го ангажира Ракитиќ, клубовите се договорија за висината за обесштетувањето, но хрватскиот репрезентативец одби да се пресели во Торино и остана на „Камп Ноу“ за да докаже дека заслужува поголема улога во тимот.
Но, Ракитиќ сезонава испадна од првиот тим и е свесен дека неговите денови како играч на шпанскиот шампион се одбројани и прифаќа преселеба во Серија А.
Негова најголема желба е да се врати во Севиља но поради економската криза настаната од пандемијата на коронавирусот, неговиот поранешен клуб не е во можност да ги исполни барањата на Барселона.