Рајан Гигс повеќе не е селектор на Велс
Рајан Гигс вечерва поднесе оставка на функцијата селектор на фудбалската репрезентација на Велс, објави Би-Би-Си.
Поранешниот фудбалер на Манчестер Јунајтед ја замрзна селекторската функција во ноември 2020 година, откако беше уапсен поради напад на неговата поранешна девојка.
– По долго размислување донесов одлука да поднесам оставка од функцијата селектор на машката фудбалска репрезентација на Велс и таа одлука стапува во сила веднаш – изјави Гигс.
Неговото место како привремен селектор го зазеде Роберт Пејџ и со репрезентацијата на Велс успеа да обезбеди пласман на Светското првенство во Катар.
– Беше чест и привилегија да ја водам репрезентацијата, но сосема е правилно што Фудбалската федерација на Велс, стручниот штаб и играчите се подготвуваат за Светското првенство без никакви шпекулации за селекторската позиција – додаде Гигс.
Велс на Мундијалот во Катар ќе игра во групата Б заедно со Англија, САД и Иран.