Првото женско списание објавено во Македонија е во фокус на дигиталната изложба „Жените во ретката периодика“
По повод празникот 8 Март, во НУБ „Св. Климент Охридски“ во Скопје, на 8 март, во 11 часот, ексклузивно ќе биде прикажана дигиталната изложба „Жените во ретката периодика“. Авторки на изложбата се д-р Марина Мијаковска и Милица Ивановска.
– Весникот „Македонка“ – Орган на Aнтифашистичкиот фронт на жените од Македонија е важен наслов од фондот на Збирката за ретка периодика. Тоа е првото женско списание објавено во Македонија. Овој периодичен наслов има големо културолошко, историско, книжевно и библиотечно значење за Македонија и Европа. Тоа е историски сведок за отпорот на македонските жени кон фашизмот и нивната борба за еманципација и стекнување на еднакви права. Овој наслов е особено релевантен за женското пишување во историјата, културата и историјата на жените, активизмот во политиката итн.
Весникот излегувал од 1944 до 1952 година во осумгодишна временска рамка и вкупно 83 броеви. Потоа трипати го менуваше насловот во „Просветена жена“, „Жена“ и „Жена нова“ – објаснуваат од НУБ „Св. Климент Охридски“.
Настанот ќе биде заокружен со поетско читање на неколку истакнати македонски писателки: Љерка Тот Наумова, Мирјана Тренчева, Билјана Станковска и Марина Мијаковска.