Првиот, „изворен“ филм „Егзорцист“ („Истерувач на ѓаволи“), снимен во 1973 година, беше  комерцијален хит со глобална заработка од 441 милион долари и 10 номинации за Оскар, а беше еден од задолжителните филмови кои мораа да го погледнат љубителите на хорор жанрот. Под режиска палка на Вилијам Фридкин, филмот ја следи мајката (Елен Барстин) која ангажира двајца католички свештеници да изведат егзорцизам врз нејзината 12-годишна ќерка (Линда Блер), опседната од демон, пренесува „Верајтеи“.

Сега е објавено дека ќе се снима нов филм кој ќе раскаже сосема нова приказна сместена во универзумот на „Егзорцист“, и кој не е продолжение на филмот „Егзорцист: Верник“ од 2023 година, во кој глумеше Лесли Одом Џуниор. Главната улога во новиот филм ќе ја има Скарлет Јохансон, што ќе биде нејзина прва улога во хорор жанрот,

Признатиот режисер на хорор филмови Мајк Фланаган зад филмовите „Проклетството на куќата Хил“ и „Полнќна миса“ — ќе го режира новиот филм, а снимањето ќе се одвива во Њујорк.

„Скарлет е брилијантна актерка чии маестрални изведби секогаш делуваат приземјено и реално, од жанровски филмови до блокбастери и не би можел да бидам посреќен што ќе биде дел од ’Егзорцист‘“, изјави Мајк Фланаган.

Не е изненадување што Универзал сака повторно да соработува со Скарлет Јохансон, која неодамна за студиото го предводеше филмот „Светот Јура: Преродба“. Филмот заработи над 850 милиони долари на глобалните кино-благајни, станувајќи еден од филмовите со најголема заработка годинава.

Инаку, Скарлет е една од најбараните ѕвезди денес, балансирајќи меѓу престижни проекти и блокбастери, а нејзините филмови заработиле над 15,4 милијарди долари ширум светот, што ја прави актерка со најголема заработка на сите времиња.