Прва лига: „Пелистерци“ ја имаат формата од Златибор, совладан Навико Академија ФМП
Две различни полувремиња во Кисела Вода, и на крајот победа на Пелистер против домашниот тим на Навико Академија ФМП со 70:79 во Првата македонска кошаркарска лига. Домашниот состав, исполнет со доста нови и млади кошаркари, се чини, ја испушти шансата во првото полувреме. Особено да креира поголема предност од онаа која ја оствари по 20 минути од мечот (39:35).
На битолчани како да им требаше тоа прво полувреме, плус и одморот од 15 минути, да заиграат според своите очекувања, но и да ја потврдат добрата форма презентирана и на првиот „балон“ во АБА 2 конкуренцијата, минатата седмица на Златибор. Заиграа „пелистерци“ далеку поефикасно во второто полувреме. Во третиот период направија целосен пресврт, и играчки и резултатски. Негативата од полувремето ја претворија во водство од (61:53).
„Во режија’ на веќе препознатливата „тројка“, Мустафица-Хаџифејзовиќ-Карутерс, тоа беше уште повисоко. По 33 минути веќе беше и 69:56, недостижно за домашниот состав кој успеа само негативата да ја претвори во едноцифрено заостанување.
Мустафица заврши со дабл-дабл ефект од 25 поени и 16 скока, Хаџифејзовиќ дополни со 17, Карутерс со 13, а двоен број на поени – 12 имаше и дебитантот во редовите на Пелистер, Карпентер. На домашната страна, Овенс запиша 18 коша, Кортесио 14, а Настовски 13.
ПРВА ЛИГА-МАЖИ
РЕЗУЛТАТИ И ДВОЈКИ 3. КОЛО
Навико Академија ФМП – Пелистер 70:79
Струмица 2022 – Феникс 2010 98:92
Чаир 2030 – Еуро Никел 2005 74:73
Куманово 2009 – Кожув 92:78
Гостивар – ТФТ 90:83
26. ОКТОМВРИ (СРЕДА):
17.00: Работнички – МЗТ Скопје Аеродром
ТАБЕЛА: Гостивар 6 бодови, Еуро Никел 2005 5, Феникс 2010 5, Пелистер 5, Чаир 2030 5, Струмица 2022 4, Кожув 4, ТФТ 4, Куманово 2009 4, Навико Академија ФМП 4, МЗТ Скопје Аеродром 3 (-1), Работнички 2 (-1).