Атанасов: Негативата не е голема и во Суботица нема да одиме со бело знаме
МЗТ Скопје Аеродром е поразен во првиот натпревар од полуфиналето во АБА 2 лигата на домашен терен против Спартак Суботица. Повеќе ТУКА
Актуелниот македонски шампион на реваншот во Србија кој ќе се одигра на 4 мај ќе брка негатива од пет коша разлика.
Тренерот на „металците“, Васко Атанасов вели дека неговите играчи не се предаваат и дека ќе го дадат максимумот на возвратниот дуел за пласман во финалето.
– Тврд натпревар во кој противникот се снајде подобро. Мислам дека можевме и подобро да минеме, особено поради добрата игра во второто полувреме. Негативата не е голема и во Суботица сигурно нема да одиме со бело знаме. Ќе се подготвуваме максимално и се надевам дека со нешто подобар офанзивен дел ќе може да го надополниме пропуштеното од Скопје – се зборовите на Атанасов.
Свој коментар за мечот во Скопје имаше и тренерот на Спартак Суботица, Владимир Јовановиќ:
– Не сум изненаден од играта на МЗТ и одличната атмосфера во Скопје, но и од резултатот. Верував дека можеме да победиме и знаев дека тоа не може да биде со голема разлика. Задоволен сум што со „плус пет“ си одиме дома. Тоа беше тврд натпревар во кој повеќе решаваа одбраните. Очекувам и реваншот да биде тежок, бидејќи системот е таков што со победа не решава ништо, туку и на следниот дуел треба да одиграте максимално ако саката понатаму – рече Јовановиќ.