Во првиот натпревар од полуфиналето во АБА 2 лигата екипата на МЗТ Скопје Аеродром во СЦ „Јане Сандански“ загуби од Спартак Суботица со 73:78 (15:23, 16:12, 24:17, 18:26).

Во текот на првата четвртина играчите на тренерот Васко Атанасов имаа позитива од четири коша разлика (13:9), а подоцна и 15:13, но од тој момент дозволија противниците до крајот на стартните 10 минути да направат серија од 10:0.

Српскиот претставник имаше и „плус 10“ на стартот од втората четвртина (25:15, 28:18). До паузата МЗТ не дозволи негативата да расте, па успеа да се доближи до само „минус четири“ (35:31).

Третата четвртина целосно им припадна на „металците“, не само што израмнија, туку и повторно да поведат на овој меч (38:37), а подоцна и да имаат предност од 44:41. Домаќините во еден момент имаа и „плус пет“ (55:50).

Во решавачките 10 минути последната позитива на МЗТ изнесуваше (57:55), а потоа Спартак направи серија од 65:59 и своето водство не го испушти до самиот крај на средбата. Во еден момент МЗТ имаше и загрижувачки „минус 10“ од 78:68, успеа да анулира пола од негативата и во реваншот патува со само „минус пет“ (78:73).

За МЗТ доминираше В. Стојановски со 20 поени, а на спротивната страна Гордиќ запиша 16 поени. Возвратниот дуел во Србија кој ќе решава за патникот во финалето ќе се игра на 4 мај.