Најдобриот светски тенисер Новак Ѓоковиќ кој е слободен во првото коло на турнирот во Рим, Италија, вели дека е на добар пат да биде во топ форма на најголемиот турнир на земјена подлога.

Србинот изјави дека турнирот во Рим кој започна вчера, како и следниот период ќе го искористи за што подобро да се подготви за „Ролан Гарос“ во Париз кој ќе се одржи од 20 мај до 9 јуни.

– На добар пат сум да бидам во врвна форма на Ролан Гарос. Одработив добар тренинг, се надевам дека ќе играм подобро во Рим отколку во Монте Карло, целта е да одам што подалеку – рече Ѓоковиќ на прес-конференцијата во Рим.

Во второто коло на турнирот во италијанскиот град Ѓоковиќ ќе игра против подобриот од дуелот Корантен Муте – Роман Сафиулин.

– Задоволен сум како поминаа последните 14 дена. Со оглед на тоа што следуваат Ролан Гарос, Вимблдон и Олимпијадата, ова е важен период за мене. Но, да тренираш со спаринг партнери не е исто како да играш против најдобрите играчи во светот. Морам повторно да го пронајдам мојот ритам – додаде Ѓоковиќ.

Српскиот тенисер оваа сезона учествуваше на четири турнири и сè уште нема освоено титула.