Прва лига: Кошаркарите на ТФТ во драматична завршница го совладаа Чаир 2030
Екипата на ТФТ Моцарт го победи Чаир 2030 со резултат 70:69 за 3:1 во серијата за пласман во полуфиналето од плеј-офот на Првата македонска кошаркарска лига. Играчите на ТФТ во полуфиналната фаза го чекаат победникот од серијата во која МЗТ Скопје Аеродром води моментно со 2:0 против Гостивар, а претходно како полуфиналист се промовираа и Работнички и Пелистер.
Гостите од Чаир во СРЦ „Кале“ – Скопје по осум минути игра имаа солидни 18:12, а по првата четвртина нешто пониски 20:17. Чаир 2030 ја контролираше својата позитива, имаше 36:29, но домашниот кошаркар Калхун не дозволи нешто повеќе од тоа, ја сведе предноста на противникот на само „еден посед“, (34:36). Откако „разменија“ по една „тројка“ со Галовеј, разликата остана иста, (40:38) во корист на Чаир 2030 пред почетокот на големиот одмор.
Пресврт видовме во третата четвртина, ТФТ направи серија од 12:4 со која го презема водството. Поведе домашната екипа со 50:44 во средина на тој дел од играта. Во понатамошниот период не функционираше нападот на Чаир 2030 и тоа го казни ТФТ кој ја продолжи серијата на 17:4 за сега веќе „двоцифрени“ 55:44.
По 30 минути игра ТФТ имаше 60:49) на семафорот, а во последниот период гостите се погрижија да намалат на достижни 59:66 на неполни три минути до крајот. Чаир 2030 не се предаваше, при 62:68 реализираше седум поени, не примија ниту еден, и успеа да поведе 69:68, по тројката на Роби, по која останаа само 54 секунди за одлука.
Ташовски беше половичен од линијата за слободни фрлања, за (69:69), а Галовеј не погоди, можеби и за победа на Чаир 2030. Последниот напад го имаа домаќините, но Ташовски направи грешка, и им даде уште една шанса на гостите. Но, Роби не го погоди шутот за триумф, а згора на тоа Далгер го фаулираше Хаутон. Не го погоди првото, но затоа беше прецизен во второто, за 70:69, за крај од мечот кој го даде третиот полуфиналист на доигрувањето за титулата, а во кој „трилингот“ на ТФТ Моцарт, Ташовски-Николов-Калхун, искомбинира 47 поени. Кај Чаир 2030, најмногу работи во играта зависеа од Галовеј, кој заврши со 26 реализирани поени (и 10 скока) и Роби кој дополни со 19 поени.