Со блокада на регионалниот пат Струга – Дебар денеска и вчера во периодот од 16 до 17 часот, жителите на струшкото село Враништа го изразија незадоволството за немањето канализација и застарената водоводна мрежа.

Претседателот на месната заедница „Враништа”, Иванчо Милески вели дека иако последните куќи се само 200 метри оддалечени од колекторскиот систем на општина Струга, селото не е приклучено на него. Проблем за жителите на ова струшко село, како што додаде, е и немањето доволно вода од водоводниот систем, посебно во летниот период, поради, според него, старата и дотраена водоводна мрежа.

– На само еден километар од центарот на селото или 200 метри од последната куќа се наоѓа градскиот колекторски систем, но ние не сме поврзани на него. И покрај сите предизборни ветувања во 21 век немаме канализациска мрежа. Дополнително, во летниот период немаме доволно вода од водоводната мрежа, која е стара 50 години. Кога ќе ги пуштиме чешмите често тече рѓа од цевките, изјави Милески.

Месната заедница, како што нагласи, доставила барање до Општина Струга и Министерството за транспорт и врски пред 15 дена, но досега не добиле одговор. Мештаните велат дека доколку институциите немаат слух за нивниот проблем за две недели ќе ги радикализираат протестите.

– Ќе го блокираме патот Струга – Дебар кај Шумски мост и граѓаните ќе мора да бараат други алтернативни патишта по селата за да стигнат до саканата дестинација. Во краен случај ќе го блокираме и колекторот, со што ќе се блокира канализациската мрежа на цела општина, додаде Милески.

Извор: МИА