Седуммесечно бебе било пронајдено оставено на клупа во парк на подрачјето на Шуто Оризари, информираат од МВР. По извршен преглед на скопските клиники, лекарите констатирале дека бебето е во добра состојба.

– На 15.06.2026 во 19:30 часот во СВР Скопје, А.С. од Скопје пријави дека во парк на подрачјето на Шуто Оризари на клупа пронашол оставено бебе старо седум – осум месеци. Полициски службеници од СВР Скопје излегле на местото, а екипа на Итна медицинска помош бебето го пренела во Комплексот клиники „Мајка Тереза“, каде што е извршен преглед и утврдено е дека бебето е во добра здравствена состојба без видливи повреди – соопштија од полицијата.

По преземени мерки, во Полициското одделение Шуто Оризари на разговор се повикани М.М.(49), И.М.(54) и Ш.М.(32), сите од Скопје, кои појасниле дека Ш.М. на подрачјето на Центар се сретнала со С.Н., која ѝ го дала детето да го причува.

– Откако С.Н. не се вратила, Ш.М. со бебето заминала во населбата Шуто Оризари и го оставила детето во паркот – појаснуваат од МВР за случајот.

За настанот е известен јавен обвинител и се преземаат мерки за целосно расчистување на случајот.