Промовирана е новата збирка колумни „Дремка за двајца“ од Братислав Димитров
Драмскиот писател, драматург и колумнист Братислав Димитров објави нова книга со свои нови и некои постари колумни. Книгата „Дремка за двајца“ ја дополнува низата на претходно објавените пет книги со колумни: „Малку блуз за твојата душа“, „Најважната работа на светот“, „Симни го малку небото за да се качам“, „Последните акорди на тишината“ и „Рецепти за осаменост“.
Тој е еден од ретките автори во светот кој еднакво е читан од млади и стари, богати и сиромашни, монахињи и монаси, криминалци и проститутки, академици и работници. Неговите колумни ќе ве насмеат, замислат, а понекогаш ќе предизвикаат и тага, не носталгија, за некои минати времиња.
Со пишување колумни почнал да се занимава уште од 1969-71 година во тогашниот студентски весник „Фокус“, а потоа во „Жена“, „Дневник“, „Утрински весник“, „Теа модерна“, „Публика“ и „Радио Слободна Македонија“. Дипломирал на ФДУ во класата на Љубиша Георгиевски. Напишал 11 драмски текстови кои се изведени на театарските сцени кај нас и во странство. Заедно со Петар Темелковски и Петар Мирчевски го измислил правецот „џукелизам“.
Во неговата биографија е запишано и дека носи мустаќи од 1971 година. Живеел и работел во Лондон, Амстердам, Норвешка и т.н. како келнер, возач на виљушкар, продавач на бензин. Бил кандидат за градоначалник на Скопје. Триесет и осум години бил драматург во Македонскиот народен театар и две години директор на Театарот за деца и младинци. Засадил седумнаесет дрвја пред зградата во која живее.
(Текстот е објавен во „Културен печат“ број 102, во печатеното издание на весникот „Слободен печат“ на 23-24 октомври 2021)